मुल्यांकन वृद्धिको विरोधमा तातोपानीको कारोवार ठप्प

सिन्धुपाल्चोक, जेष्ठ ८ - अवैज्ञानिक र अब्यवहारिक ढंगले चिनियॉ वस्तुको मुल्यांकन वृद्धि गरेको भन्दै ब्यापारीले तातोपानी भन्सारबाट हुने ब्यापरिक कारोवार आइतवारदेखि बन्द गरेका छन् । भन्सार कार्यालयका अनुसार ब्यापारीले कुनै पनि सामान छुटाएका छैनन् भने राजश्व संकलन ठप्प भएको छ ।

भन्सारले चीनबाट नेपाल पैठारी हुने मालवस्तुमा २ दिन अघिदेखि लागू हुने गरी १० देखि १ सय ५० प्रतिशतसम्म मुल्यांकन वृद्धि गरेको थियो । सिन्धुपाल्चोक उद्योग वाणिज्य संघले कम गुणस्तर वस्तुको पैठारी हुने यो नाकाको मुल्यांकन अन्य भन्सार सरह गरेको र यसबाट चोरी निकासीले प्रस्रय पाउने भन्दै समस्या नसुल्झेसम्म कारोवार नगर्ने निर्णय गरेको छ । भन्सार विभागको निर्देशन वमोजिम तयारी पोशाक, कपडा, छाता, ब्याग, जुत्ता, चप्पल, छाला प्लाष्टिक र आलमुनियमका सामान, ट्वाईलेट पेपर, माटाका भॉडा, इलेक्ट्रोनिक सामानलगायत अधिकांश वस्तुमा मुल्यांकन वृद्धि गरिएको छ ।

भन्सार ऐनले पैठारीकर्ताले घोषणा गरेको मुल्यलाई आधार मान्नुपर्ने प्रष्ट नीति भएपनि गुणस्तरियका सामान आयात हुने अन्य भन्सार र चीनको स्थानीय बजारमा उत्पादित न्युन गुणस्तरका सामानको मुल्यांकन एउटै नहुने दावी संघका अध्यक्ष राजेन्द्रकुमार श्रेष्ठले गरे ।भन्सार ऐनमा ब्यवस्था भएको कारोवार मुल्यलाई आधार मानेर मुल्यांकन तोक्नु पर्ने माग उनको छ । भन्सार प्रमुख निर्मलहरि अधिकारीले भने स्थानीय सीमा बजारको मुल्य, अन्य नाकाबाट हुने कारोवार, स्वदेशी बजारको मुल्यलाई आधार मानेर मुल्यांकन बढाएको वताए ।

उनले मुल्यांकनको मुख्य आधार सिआईएफ नीतिलाई नै भएपनि ब्यापारीले खरिद मुल्यलाई जस्ताको तस्तै नदेखाएको अवस्थामा बजार अनुगमनका आधारमा यस्तो निर्णय लिने अवस्था आएको वताए । ब्यापारी र भन्सार प्रशासनबीच तातोपानी नाकामा वार्ता भइरहेको छ । चीनसँगको प्रमुख ब्यापारिक नाका बन्द हुँदा दैनिक ९० लाख राजश्व संकलन रोकिएको छ । खासा क्षेत्रमा रोकिएका र तातोपानी भन्सार यार्डमा प्रवेश गरेका करोडौं सामान वोकेका कन्टेनर अलपत्र छन् । साभार : इ - कान्तिपुर