पत्रकारमाथि आक्रमण गर्नेलाई ज्यान मुद्दा चलाइने

विराटनगर, जेष्ठ २४ - सञ्चारकर्मीमाथि सांघातिक आक्रमण गर्नेलाई प्रशासनले ज्यान मार्ने उद्योग मुद्दामा कारबाही चलाउने भएको छ । आफूहरूविरुद्ध समाचार लेखेको भन्दै एमाले निकट युवा संघ र युथफोर्स कार्यकर्ताले नागरिक दैनिकका यहाँस्थित संवाददाता खिलानाथ ढकाललाई आइतबार राति मरणासन्न कुटपिट गरेका थिए । पत्रकार महासंघ मोरङ शाखाले सोमबार घटनाबारे प्रशासनमा ज्ञापन र प्रहरीमा किटानी जाहेरी दिएपछि प्रमुख जिल्ला अधिकारी सुरेश अधिकारीले कारबाही गर्ने प्रतिवद्धता जनाएका हुन् । दोषीमाथि तत्कालै कारबाही चलाउन आफूलाई गृहमन्त्री र प्रधानमन्त्रीका निजी सचिवको निर्देशन आइसकेको जानकारी अधिकारीले दिए ।

सख्त घाइते ढकालको कञ्चनबारीस्थित नोबेल मेडिकल कलेजमा उपचार भइरहेको छ । उनको नाकको हड्डी भाँचिनुका साथै अनुहार, हात र ढाडमा चोट लागेको छ । कुटपिटमा संलग्न युवा संघ नगर संयोजक रोहित कोइरालालाई प्रहरीले राति नै नियन्त्रणमा लिएको छ ।
नगर संयोजक कोइरालाले पटकपटक टेलिफोन गरी ढकाललाई 'सानो काम छ' भन्दै बेलुकी ट्राफिक चोकमा बोलाएर अपहरण शैलीमा शिक्षा कार्यालय नजिक जनपथ टोल पुर्‍याइ मोबाइल खोसेर कुटपिट गरेको पीडित ढकालले बताए । उनका अनुसार युथफोर्स मोरङका संयोजक तथा युवा संघका उपाध्यक्ष पर्शु बस्नेतको निर्देशनमा कोइराला र बस्नेतका पूर्वचालक मनोज राईले आक्रमण गरेका हुन् । राई फरार छन् ।

संघ अध्यक्ष रविन थापा र फोर्स संयोजक बस्नेतले सोमबारै संयुक्त विज्ञप्ति जारी गरी घटनामा आफ्ना संगठनको संलग्नता नरहेको दाबी गरेका छन् । प्रेस चौतारी र मानव अधिकार तथा शान्ति समाजले विज्ञप्ति जारी गर्दै समाचार लेखेकै कारण भएको आक्रमणको विरोध जनाएका छन् ।साभार : इ कान्तिपुर