फाङ्गी पर्व पोर्तुगलमा पनि मनाए शेर्पाहरुले

लिस्बोन । नेपालमा खेतीपातीको समयपछि हुने फुर्सदको समयमा धुमधामकासाथ मनाउने फाङ्गी पर्व पोर्तुगलमा शेर्पाहरुले पनि रमाइलो गरी मनाएका छन् । नाचगान, खानपीन र नव आगन्तुक शेर्पाहरुसँग परिचयसहित लिस्बोनमा रहेका सबै शेर्पाहरु भेला भएर फाङ्गी मनाएका हुन् ।

“डाँडाकाँडा काटेर को-हो को-हो जस्तो भेट भइयो, विश्वास गरेर मनपेट खोल्दै कुराकानी गरेपछि एउटै सन्तानहरु पो रहेछौं” यस्तै एतिहासिक अभिव्यक्तिको स्याब्रु नाचमा शेर्पाशेर्पिनीहरु कम्ति रमाएनन् ! समूहमा ढल्कदै नाचे, दोहोरी गाए, बेस्सरी रमाए ।

‘नेपालमा हुँदा ४-५ दिनसम्म मनाइन्थ्यो, यहाँ पनि फाङ्गी मनाउँदा नेपालमै रहेजस्तो रमाइलो लाग्यो’ युवा छेसाङ लामाले स्याब्रुमा नाच्दै भने । ‘फाङ्गीमा गाउँलेहरु एकै ठाउँमा भेला भएर दुखसुख साटासाट गर्ने, रमाइलो गर्ने, खानपीन गर्ने गरिन्छ ।’ किदुग अध्यक्ष कान्छा शेर्पाले प्रष्ट्याउनुभयो, ‘स्याब्रु नाच चाही बिहेवारी, मेलापात र वनमा चौरी चराउँदा गाइन्छ । यसमा एतिहासिक र मायाप्रीतिका शब्दहरु समावेस हुन्छन् ।’

कार्यक्रम सफलताको कामनासहित एनआरएन पोर्तुगलका उपाध्यक्ष पेम्बा शेर्पा, युरोप शेर्पा किदुग सचिव पेम छिरी शेर्पा, योगेन्द्रमिलन छन्त्याल, मिङ्गी शेर्पा र रिञ्जी शेर्पाललगायतले आ आफ्नो शुभकामना मन्तव्य राखेका थिए ।

किदुगलाई निरन्तर सहयोग गरेकोमा लामा सार्की शेर्पालाई खादा ओढाएर आभार व्यक्त गरिएको थियो । आगामी ल्होसारको आयोजना गर्न पेम्बा शेर्पा, निङ्मा छिरी शेर्पा, सेम स्याङ शेर्पा, केसाङ शेर्पा र ङ्वाङ ल्हामु शेर्पा गरी ५ सदस्य रहेको आयोजक समिति (लावा) गठन गरिएको छ । कार्यक्रममा सहभागीहरु सबैबीच खोलिएको रमाइलो चिट्ठामा दावा शेर्पाले प्रथम र आनन्द शेर्पाले द्वितीय पुरस्कार प्राप्त गरेका थिए ।

युरोप शेर्पा किदुगको आयोजनामा गोर्खा रेष्टुरेन्टमा सम्पन्न कार्यक्रमको अध्यक्षता किदुग अध्यक्ष कान्छा शेर्पा र सञ्चालन सचिव धनराज शेर्पाले गर्नुभएको थियो ।